Qadın voleybolçuların AÇ-nin kuboku, topu və maskotu KİV təqdim olunub

21-28 avqust aralığında qadın voleybolçular arasında növbəti Avropa çempionatı (CEV EuroVelloy Vomen-2026) keçiriləcək. Azərbaycan, Türkiyə, Çexiya və İsveçrənin ev sahibliyi edəcəyi bu çempionatda 24 milli komanda hərəsində 6 yığma olmaqla 4 (A, B, C və D) qrupda mübarizə aparacaq. Azərbaycan yığmasının yer aldığı C qrupun oyunları paytax Bakıdakı Milli Gimnastika Arenasında keçiriləcək. Millimiz ev sahibliyi edəcəyi C qrupunda Portuqaliya, Hollandiya, Belçika, Rumıniya və İspaniya yığması ilə mübarizə aparacaq. Reqlamentə görə, qrup mərhələsində ilk 4 yeri tutan komandalar (ümumilikdə 16 komanda) mübarizəni 1/8 finaldan davam etdirəcək. 1/8 və 1/4 final oyunları Türkiyənin İstanbul və Çexiyanın Brno şəhərində keçiriləcək. AÇ-2026-nın yarımfinal və final oyunları isə İstanbulda təşkil ediləcək.  

Yeri gəlmişkən, bu çempionatla bağlı iyunun 7-də Bakı Voleybol Mərkəzində mətbuat konfransı keçirib. Qeyd edək ki, Azərbaycan Voleybol Federasiyasının (AVF) prezidenti Şahin Bağırov, qurumun vitse-prezidenti və millinin baş məşqçisi Faiq Qarayev və yığma komandamızın kapitanı Ayşən Abduləzimovanın iştirak etdiyi bu toplantıda qurumun yeni loqosu, yeni rəsmi internet saytı, eləcə də Avropa çempionatının topu, kuboku və maskotu KİV nümayəndələrinə təqdim edilib və şəkillər çəkdirilib. 

Mətbuat konfransında ilk söz alan qurum rəhbəri Şahin Bağırov əsasən federasiyanın gördüyü işlərdən və qarşıdakı planlardan söhbət açıb. O, 16 yaşlı qızlardan ibarət yığma komandamızın MDB oyunlarında üçüncü yeri tutmasını, ölkəmizdə bu idman növünün yeniyetmələr və gənclər arasında sürətlə inkişaf etdiyini xüsusilə vurğulayıb. Onun sözlərinə görə, hazırda yeniyetmə və gənclərdən ibarət milli komandalara 30-dək millin qız cəlb edilib. 

Çıxış edən baş məşqçi Faiq Qarayev isə millimizin qarşıdakı Avropa çempionatına hazırlıq planlarından danışıb. O, həm də ötən ay keçirilən və millimizin də iştirak etdiyi Avropa Liqasının yekunlarını xatırladıb. Yetirmələrindən razı qaldığını gizlətməyin baş məşqçi qarşıdakı Avropa çempionatına döyüşən komanda hazırlamaq niyyətində olduğunu da dilə gətirib.

Son çıxış edən millinin kapitanı Ayşən Abduləzimova isə qısa və lakonik fikir söyləyib: "Əsas məqsədimiz ilkin qrup mərhələsini uğurla başa vurmaqdı və növbəti mərhələyə adlamaqdır".

İNTİQAM Məmmədov