Akif Əli: 

Kim kimi cərimə etməlidir?!

Bakıda nəqliyyat ilinin ən dəhşətli bir günü yaşandı.

Hələ belə əzabverici tıxac görünməmişdi.

Taksidə, xidməti, ya şəxsi avtomobilində məsələn, “Gənclik”dən “Azneft”ə 4 dəqiqəlik bir iş dalınca gedib-qayıdanlar ən azı 4 saat küçələrdə süründülər. 2 saat üzü aşağı, 2 saat üzü yuxarı. Və işlərini də görə bilmədilər.

Bakı şəhəri sanki yiyəsiz qalmışdı. İntellektual idarəetmə intellektsiz idarəetməyə dönmüşdü. Yüzlərlə, minlərlə, on minlərlə maşın küçələrdə bir-birinə qısıla-qısıla addım-addım... getmirdi, sürünürdü. At izi it izinə qarışmışdı: o sıxlıqda nə küçə görünürdü, nə küçənin asfaltı, nə asfaltın üstündəki yol nişanı... Amma və lakin...

Burada icazənizlə bir haşiyə çıxım, ammasını sonra deyim.

...Tələbə vaxtı oxuduğum V.Ovçinnikovun “Sakura budağı” kitabında belə bir ştrix vardı. Yaponiyada olanda bir gün səhər tezdən müəllifin qaldığı otel otağının qapısı döyülür. Yapon qulluqçu təzim edərək ona bir bağlama uzadır. O, bağlamanı açıb içində kiçik suvenir hədiyyə və bir kağız görür. Kağızda şəhər bələdiyyəsi yazırdı ki, gündüz saat 12-dən 12:30-dək Sizin qaldığınız otağın pəncərəsinin önündən keçən küçədə kanalizasiya xəttində təmir işləri aparılacaqdır. O zaman motor səsinin yaradacağı narahatlığa görə Sizdən üzr istəyirik...

İndi qayıdaq Bakıya.

Cümə günü idarə olunmayan Bakı küçələrində 4 saat avtomobildə sürünən, vaxtını, əsəblərini, benzin ehtiyatını və görəcəyi işləri itirən adamlardan nəinki üzr istənildi, əksinə, adamları borclu çıxartdılar. Həmin axşam sürücülərin telefonuna mesajlar göndərdilər ki, bəs gündüz filan küçədən keçəndə yerdəki xətti tapdalamısınız. Ona görə də barənizdə inzibati xəta haqqında protokol tərtib edilib (“Yol nişanlarının tələblərinə riayət edilməməsi”). 40 manat cərimə ödəməlisiniz!

Bax belə!

Bütün günü küçələrdə yüzlərlə, minlərlə, on minlərlə maşın bir-birinin böyrünə sıxıla-sıxıla ehtiyatla sürünüb. Aşağı da baxanda dəmir görünüb, yuxarı da baxanda dəmir görünüb. Nə asfaltın üstü görünüb, nə də asfaltın üstündə çəkilən yol nişanı. Ümumiyyətlə, küçələrdə sanki həyat dayanmışdı. Əsil infarkt mühiti vardı. Yollarda kilometrlər boyunca ancaq tıxac idi, nəqliyyat tənzimlənmirdi, aləm bir-birinə qarışmışdı. Adamlar mənzil başına gedib çata bilmirdi, görmək istədikləri işi vaxt itgisi səbəbindən görə bilmirdi.

Saatda 0,5 km sürətlə qarış-qarış gedən avtomobil yerdəki xətti basdalasa nə olacaqdı, basdalamasa nə olacaqdı? Burda cəzaya layiq qəza şəraiti yaratmaq mümkün deyildi. Əslində qəza şəraiti o xəttin üstündə yox, əsas vəzifəsi şəhəri, küçələri, yolları, nəqliyyat axınını idarə edib nizamlamalı olan əlaqədar qurumların kabinetlərində baş verirdi.

Tıxaclarda saatlarla vaxtını itirən adamların hər dəqiqəsi qızıl deyilmi?! İnsan ömründən gedən bu dəqiqələri, saatları, günləri, itirilən əsəb sistemini, sağlamlığı hansı vəsaitlə kompensasiya etmək mümkün olacaqdır?!

Qoy özləri desin: o gün kim kimi cərimə etməli idi?!

Problem heç də 40 manatda deyil. O tıxacda onsuz da hər maşın az qala 50 manatlıq benzin yandırdı. Problem paytaxtda o situasiyanı yaradanlarda, o situasiyanı idarə edə bilməyənlərdə və o situasiyanı nəzərə almadan göydəki avtomatik foto çəkilişini götürüb analiz etmədən, heç nəyi nəzərə almadan zavallı sürücülərə haqsız, ədalətsiz cərimələr yazanlardadır!

Şəkili çəkən robotdur, bəs onu yazıb göndərənlər?!

* * *

Javid Abbasov

Regionlarda iş yerləri yaradılsaydı, region əhalisi hamı bir nəfər kimi Bakıya köçməyə məcbur olmazdı. Bakı şəhəri salınanda bu qədər əhali üçün nəzərdə tutulmayıb - heç bir infrastruktur baxımından ((( Bu azmış kimi, ictimai nəqliyyatın iş keyfiyyəti o qədər bərbaddır ki, hamı xərcə-borca düşüb şəxsi maşın almağa məcbur olur. Bu problem saysız-hesabsız halqalara malik bir zəncirdir, tuği-lənət olub keçib bogazımıza 

Fəxrəddin Aĝayev

İlk öncə Bakıdan Neft akademiyası və Tibb unversitindən başqa bütün unversitetlər rayanlara köçürməlidi .Bakı şəhərində yeni binaların tikintisi dayandırılmalıdı 

Etibar Cəbrayıloğlu

Deyirlər ki, camaat iftara getdiyinə görə nəqliyyat sıxlığı yaranır. Ramazan ayı bitəndən sonra görək günagkar kim olacaq...

Eldar Muellim

Cərimələmə mətodikasi, cərimələmə texniki təchizatlar, cərimə ucun huquqi baza qanunvericilik maddələri maşallah çox yuksək səviyyədə, cox operativ işləyir. Kaş butun sahələrdə də operativlik bu səviyyədə olardi.

Ilkin Pireli

Akif müəllim, sıxlığın yaranmasına səbəb süni maneələrin yaradılmasıdır. Yolu bağlayırlar, vəssalam. Belə olan halda, əlbəttə, hərəkət etmək mümkün olmayacaq. Adı da o olur ki, Bakıda avtomobil çoxdur və s.

Elmira Abbasova

Çox aktual mövzuya toxunmusuz, var olun, həqiqətən də həmin gün evə gələnlər yolda yaranan probkadan elə həyəcanla danışırdılar ki... Həmin gün qonşumun qızını hamamda qazdan az qala boğulurdu, 40 dəq. Təcili yardımı gözlədikdən sonra öz maşınları ilə xəstəxanaya apardılar...

QEYD. Başlıqlar "Facebook" sosial şəbəkəsindəki başlıqla eynilik təşkil edir.