Bəybala Mirzəyev:

Putinin sonuncu ili...

Qazaxıstandan olan müstəqil ekspert və bloger dostumuz Nurlan Saltayev yazır ki, bu il Rusiyanın taleyinin həll olunacağı sonuncu ildir.

Sitat:

"Bugünkü vəziyyət taleyüklü və kritikdir.

Rusiya parçalanmalıdır.

İndiki Rusiyanın üçdə ikisində türkdilli xalqlar yaşayır. Bu, vahid plan yaratmaq və kritik vəziyyətin daha da inkişafı üçün böyük bir bazadır, təməldir. Aydın məsələdir ki, bu gün Rusiyanın özündə bu barədə danışmaq ölümcül dərəcədə təhlükəlidir.

Amma başqa məqam, başqa fürsət də var ki, onun həyata keçirilməsi bütün dünyanı türk məsələsinə başqa gözlə baxmağa məcbur edəcək. Bu, Avropada yaşayan bütün Rusiya türklərini: tatarları, başqırları, yakutları, buryatları, qaraçayları, balkarları, kumıkları, noqayları və s. tatarların qanadı altında bir araya gətirmək, bir yumruq kimi birləşdirmək fürsətidir. Beləliklə, sizin iki milyonluq diasporunuz olacaq. Bu diaspora Avropa İttifaqının əsas qurumlarında söz sahibi olacaq. Bu hərəkat həm Rusiyanı, həm də beynəlxalq birliyi onunla hesablaşmağa vadar edəcək. Onlara Avropada olan qazaxlar, özbəklər, azərbaycanlılar, türkmənlər, qaraqalpaqlar da qoşulacaq".

(sitat bitdi)

Qazaxıstanlı ekspertin bu çağırışı olduqca önəmlidir. Rusiya kimi şər imperiyasını məğlub etmək, bitirmək üçün təkcə Ukraynanın gücü yetərli deyil. Bunun üçün Rusiyanın tərkibindəki türk xalqları və xaricdə yaşayan diaspor birlikləri də hərəkətə keçməlidir. Eyni zamanda postsovet ölkələri də Rusiyanın çökdürülməsi üçün əllərindən gələni etməlidirlər. Çünki bu şər imperiyası dağılıb məhv olmayınca nə qonşu ölkələr, nədəki dünya dinclik tapmayacaq.

P.S.

Unutmamalıyıq ki, Putin kimi kiborqlaşmış, zombiləşmiş şəxslər üçün insanların və millətlərin taleyi əsla önəmli deyil. Bu varlıq istənilən an nüvə silahına əl ata biləcək qədər olduqca təhlükəli bir zehniyyətə sahibdir.

* * *

Qalib Arif

Allah sizi güldürsün, Həmkar! Rusiyanın taleyini nə vaxtdan Qazaxıstandan olan müstəqil ekspert və blogerlər həll edir?! Siz Trampın, Avropanın Rusiyayla nə qədər ehtiyatla davrandığına baxın. Pisdir, ya yaxşıdır, amma faktdır: Bu xəmir hələ çox su aparacaq...

Beybala Mirzeyev

Qalib müəllim, gülməli olan odur ki, siz məsələnin məğzini yanlış başa düşmüsünüz. Rusiyanın taleyini Qazaxıstandan olan müstəqil ekspert və blogerlər yox, Putin və onun neoimperialist, işğalçı komandası həll edir. Putinin "blitskriq" yoluyla üçcə günə almağı planlaşdırdığı Ukrayna "bataqlığ"ında 3 ildir ki, çabalaması Rusiyanın aqibətinin hara doğru getdiyini göstərir.

Trampın Rusiya ilə ehtiyatla davranması onun Rusiyadan qorxduğu anlamına gəlmir. Trampın əsas geosiyasi hədəflərindən biri Rusiyanı Çindən uzaqlaşdırmaq, bu yolla Çini təkləmək, təcrid etmək və Çinin "Bir kəmər, bir yol" kimi qlobal təşəbbüslərini bloklamaqdır. Çünki Çin hazırda ABŞ-ın bir nömrəli əsas rəqibi sayılır.

Baydenin dönəmində ABŞ və Avropanın Rusiyaya qarşı ehtiyatlı mövqe seçməsinin əsas səbəbi isə manyak Putinin nəinki Qərbi, hətta bütün dünyanı nüvə silahı ilə hədələməsi ilə bağlı idi. "Rusiyanın mövcud olmadığı dünya bizim nəyimizə lazımdır" zehniyyəti bütün bəşəriyyətin nüvə silahıyla təhdid edilməsinin əyani təzahürü idi.

Qalib Arif

Beybala Mirzeyev Həmkar, mən 20 il bundan əvvəl, biz bir yerdə Xalq qəzetində işləyəndə hər şeyi düzgün başa düşürdum. Mən onda siyasi icmalçı idim, siz incəsənətdən yazırdız...

QEYD. Başlıqlar "Facebook" sosial şəbəkəsindəki başlıqla eynilik təşkil edir.