Rusiya sərhəddə “sanitariya zonası” yaratmağa başlayıb

“Şimal” qüvvələr qrupunun mətbuat mərkəzinin rəhbəri Yaroslav Yakimkin bildirib ki, Rusiya Silahlı Qüvvələri “Rusiya regionlarının təhlükəsizliyini təmin etmək məqsədilə” Ukraynanın sərhədyanı ərazilərində hücum əməliyyatlarını davam etdirir.

Rusiya qoşunları Ukrayna Silahlı Qüvvələrinin bölmələrini Kursk vilayətindən çıxardıqdan sonra dövlət sərhədində “sanitariya zonası” yaratmağa başlayıb.

“Hazırda qoşunlar Rusiyanın sərhədyanı bölgələrində mülki əhalinin müdafiəsi üçün düşməni sərhəddən uzaqlaşdıraraq hər gün irəliləyir”, - deyə Yakimkin bildirib. 

Onun sözlərinə görə, Ukraynanın Sumı vilayətində Maryino və Loknya yaşayış məntəqələri Rusiya qüvvələrinin nəzarətinə keçib. Bundan əlavə, Rusiyanın "Şimal" qrupu Xarkov vilayətinin Volçansk şəhəri ərazisində mühüm irəliləyiş əldə edib.

Rusiya Müdafiə Nazirliyinin vurğuladığı kimi, “sanitariya zonası”nın yaradılmasında məqsəd Ukraynadan gələn təhlükələri minimuma endirmək və Rusiya ərazisində mümkün atəş və ya təxribatın qarşısını almaqdır. Nəşrin dərc edildiyi vaxt Ukrayna tərəfi bu bəyanatlara münasibət bildirməmişdi.

Mayın 22-də Rusiya prezidenti Vladimir Putin hökumətin iclasında bəyan edib ki, rus qoşunları Rusiya-Ukrayna sərhədi boyunca bufer zonasının yaradılması tapşırığını yerinə yetirir. Bundan əvvəl Rusiya Müdafiə Nazirliyi aprelin sonunda Kursk vilayətinin Ukrayna qoşunlarından tamamilə azad edildiyini açıqlamışdı.