İlk qitə çovqan çempionatı başladı

Beynəlxalq Çovqan Federasiyasının təşkilatçılığı ilə tarixdə ilk dəfə olaraq Polşada Çovqan üzrə Avropa Çempionatı keçiriləcək.

Turnir iyunun 3-dən 7-dək Polşanın Şonovitse şəhərində keçiriləcək. Bu mötəbər yarışda Avropa qitəsini təmsil edən altı ölkənin - Azərbaycan, Böyük Britaniya, Macarıstan, Malta, Polşa və Türkiyənin yığma komandası iştirak edəcək.

Çempionat çərçivəsində iyunun 4-də Beynəlxalq Çovqan Federasiyasının III Baş Assambleyası da keçiriləcək. Assambleya zamanı yeni üzvlərin qəbulu, növbəti qitə yarışlarının keçirilmə tarixləri və yerləri, həmçinin federasiyanın gələcək fəaliyyət istiqamətləri ilə bağlı müzakirələr aparılacaq.

Qeyd edək ki, Beynəlxalq Çovqan Federasiyası tək illərdə qitə birinciliklərinin, cüt illərdə isə dünya çempionatlarının təşkilini nəzərdə tutan uzunmüddətli yarış təqvimi formalaşdırıb. 2025-ci il ərzində Asiya, Cənubi Amerika, Afrika və Avropada çempionatların keçirilməsi planlaşdırılır.

Yada salaq ki, Beynəlxalq Çovqan Federasiyası 2024-cü ilin fevralında Bakıda 19 ölkənin iştirakı ilə yaradılıb və nizamnaməsi təsdiq edilib. Həmin ilin iyununda keçirilən növbədənkənar ikinci assambleya zamanı federasiyaya üzv olan ölkələrin sayı 54-ə çatdı.2024-cü ildə Bakıda 10 ölkənin iştirakı ilə Çovqan üzrə ilk dünya çempionatı təşkil olundu və Azərbaycan komandası birinci yeri tutaraq ilk dünya çempionu oldu. Həmin assambleyada növbəti dünya çempionatının 2026-cı ildə yenidən Bakıda keçirilməsi qərara alınıb.