Azərbaycanın qətiyyətli mövqeyi Düşənbədə səsləndi

Oktyabrın 10-da Tacikistanın paytaxtı Düşənbədə keçirilən MDB Dövlət başçıları Şurasının məhdud tərkibdə iclasında Azərbaycan Respublikasının Prezidenti İlham Əliyev növbəti dəfə ölkəmizin prinsipial və müstəqil mövqeyini, qətiyyətli lider obrazını, sarsılmaz dövlətçilik iradəsini nümayiş etdirdi. Bu çıxış bir daha sübut etdi ki, Azərbaycan yalnız regionda deyil, beynəlxalq aləmdə də söz sahibi olan nüfuzlu bir dövlətdir və bu statusu təsdiqləyən, səsləndirən, qoruyan güclü bir lideri vardır.
       Cənab Prezident çıxışında Azərbaycanın regional və beynəlxalq sülhə, əməkdaşlığa verdiyi töhfələrdən, müstəqil siyasət xəttindən və ədalətə söykənən qətiyyətli mövqeyindən bəhs edərək bir daha dünya ictimaiyyətinə göstərdi ki, Azərbaycan heç bir təzyiq və ya kənar müdaxilə ilə yolundan dönməyən, öz milli maraqlarını qətiyyətlə müdafiə edən bir dövlətdir.
        Prezident İlham Əliyevin çıxışında Azərbaycanın prinsipial mövqeyi aydın şəkildə ifadə olundu. Xüsusilə, ədalətin, beynəlxalq hüququn, dövlətlərin suverenliyi və ərazi bütövlüyünün qorunmasının vacibliyinə verdiyi önəm onun çıxışında açıq şəkildə öz əksini tapdı. Bu, təkcə diplomatik bəyanat deyil, həm də Azərbaycanın bu prinsiplərə sadiqliyinin və onları praktikada həyata keçirdiyinin bariz nümunəsidir.
          Azərbaycan bu gün yalnız enerji siyasəti və iqtisadi gücü ilə deyil, həm də sabitlik və inkişaf modeli ilə regionun lider dövlətlərindən biri kimi qəbul olunur. Bu statusun formalaşmasında, şübhəsiz ki, Prezident İlham Əliyevin düşünülmüş və uzaqgörən siyasətinin rolu danılmazdır. Onun qlobal və regional məsələlərə dair səsləndirdiyi fikirlər həm ölkəmizin milli maraqlarını qoruyur, həm də beynəlxalq sülh və təhlükəsizlik üçün önəmli mesajlar verir.
         Prezident İlham Əliyev sadəcə ölkə rəhbəri deyil, eyni zamanda milli iradənin, xalqın gücünün təcəssümüdür. Onun çıxışında hər bir vətəndaşın qürur duyduğu bir həqiqət səslənir: Biz güclüyük, çünki arxamızda xalqın iradəsi ilə danışan, onu layiqincə təmsil edən lider var!
       Azərbaycan xalqı əmindir ki, Prezident İlham Əliyevin rəhbərliyi ilə ölkəmiz daha böyük uğurlara imza atacaq, müstəqilliyini və suverenliyini daha da möhkəmləndirəcək, beynəlxalq aləmdə nüfuzunu durmadan artıracaqdır

Vüsal NİFTİYEV,
Masallı Rayon Mərkəzi Xəstəxanası Satınalma şöbəsinin müdiri