Millimiz Dünya Seriyasının son mərhələsində bir dəst medal qazanıb 

İki güləşçimiz - İbrahim Yusubovla Vüsal Əliyev dünya çempionu olub 

Misirin İsgəndəriyyə şəhərində cimərlik güləşi üzrə keçirilən və Azərbaycan millisinin də iştirak etdiyi Dünya Seriyasının sayca 5-ci olan son mərhələ yarısı başa çatıb. AGF-dən verilən məlumata görə, baş məşqçi Oyan Nəzərianının rəhbərliyi altında son mərhələ yarışına üç təmsilçimiz qatılıb ki, onların da hamısı inamla guləşərək medalcilar sırasında yer alıb. Medallardan biri qızıl, biri gümüş, birisə bürünc əyarlı olub. Beləliklə, millimiz Dünya Seriyasının son mərhələsini bir dəst (1-1-1) medalla başa vurub. 

Qızıl medal bütün görüşlərini qələbə ilə başa vuran İbrahim Yusubovun (90 kq), gümüş yalnız həlledici finalda büdrəyən Vüsal Əliyevin (80 kq), bürünc isə Əliyevlə eyni çəkidə güləsən və yarımfinalda məhz ona uduzan Sahib Dadaşovun aktivinə yazılıb.

Reqlamentə əsasən beş mərhələ başa çatandan sonra güləşçilərin bütün mərhələlərdə topladığı xallar hesablanıb və bunla da hər çəki dərəcəsində qalib və mükafatçılar müəyyənləşib. 

Son nəticədə millimizin iki üzvü - İbrahim Yusubov (90 kq) və Vüsal Əliyev (80 kq) dünya çempionu adını qazanıb. Yeri gəlmişkən, bu İbrahimin dördüncü dünya çempionluğu olub.

İNTİQAM Məmmədov