“Azərbaycanlıların Həmrəylik Günü: Milli birlik simvolu” – Masallıda konfrans 
 
 

 Masallıda Dini Qurumlarla İş üzrə Dövlət Komitəsinin (DQİDK) təşkilatçılığı ilə “Azərbaycanlıların Həmrəylik Günü: Milli birlik simvolu” mövzusunda konfrans keçirilib. 
     Konfransda gənclər, din xadimləri, ziyalılar və ictimaiyyət nümayəndələri iştirak ediblər.
       “Gənclər Evində” təşkil olunan tədbir öncəsi dövlət himnimiz səsləndirilib, Ulu öndər Heydər Əliyevin və Azərbaycanın müstəqilliyi, ərazi bütövlüyü uğrunda canlarını fəda edən şəhidlərimizin xatirəsi ehtiramla anılıb.
         Konfransı giriş sözü ilə açan DQİDK-nın Masallı regional bölməsinin müdiri Elvin Hüseynli bildirib ki, Dünya Azərbaycanlılarının Həmrəylik Günü yalnız təqvimdə yer alan bir bayram deyil, milyonlarla insanın yaddaşında, düşüncəsində və mənəviyyatında yaşayan bir dəyərdir: “Ümummilli lider Heydər Əliyevin yaratdığı milli birlik ideyasının bu gün Prezident, Ali Baş Komandan İlham Əliyevin rəhbərliyi ilə daha da güclənərək böyük Zəfərimizə aparan xalq həmrəyliyinin sarsılmaz nümunəsinə çevrildi. Bu gün müxtəlif dinlərin və konfessiyaların nümayəndələrinin bir ailə kimi yaşadığı Azərbaycan dünyaya tolerantlıq nümunəsi təqdim edir. Regionlarda  Komitə bölmələrinin fəaliyyəti isə dini maarifləndirmə, dialoq və əməkdaşlığı daha da möhkəmləndirir ki, bu da milli həmrəylik ideyasının ən real təzahürlərindəndir...”
       DQİDK-nin Dini məsələlər üzrə şöbəsinin Analitik təhlil və proqnozlaşdırma sektorunun böyük məsləhətçisi Azad Nəhmətov çıxışında qeyd edib ki, Azərbaycan cəmiyyəti əsrlər boyu dini dözümlülük, multikulturalizm və mənəvi dəyərlər üzərində formalaşıb: “Bu mənəvi irs bu gün də milli həmrəyliyimizin ən güclü dayaqlarından biridir. Bu kontekstdə Dini Qurumlarla İş üzrə Dövlət Komitəsinin fəaliyyəti dini icmalar arasında sağlam dialoqun təşkili, maarifləndirici tədbirlərin həyata keçirilməsi, mənəvi dəyərlərin doğru şəkildə təbliği bütövlükdə cəmiyyətin həmrəyliyinə xidmət edir...”
        Masallı Rayon İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin müdiri vəzifəsini müvəqqəti icra edən Nahid Həsənov bildirib ki, XX əsrin sonlarında Naxçıvanda sərhəd məftillərinin kəsilməsi, azadlıq ideyalarının yüksəlişi xalqımızın birliyini nümayiş etdirən tarixi hadisələr idi. Bu addımlar yalnız siyasi oyanış deyil, milli özünüdərkin güclənməsi, mənəvi dəyərlərin yenidən bərpası və toplum olaraq bir amal ətrafında birləşməyimiz idi.
        Ombudsmanın Cənub Regional  Mərkəzinin rəhbəri Ziya İsmayılov  çıxışında vurğulayıb ki, 1991-ci il dekabrın 16-da Naxçıvan Muxtar Respublikası Ali Məclisinin Ulu öndər Heydər Əliyevin sədrliyi ilə keçirilən iclasında Azərbaycan xalqının həmrəylik ruhunu gücləndirmək məqsədilə 31 dekabrın Dünya Azərbaycanlılarının Həmrəylik Günü kimi qeyd olunması qərara alınıb. Heydər Əliyev milli birlik və həmrəyliyin qorunmasını xüsusilə önəmli hesab edir, bu günün təsis olunmasını isə həmin ideyanın təzahürü kimi dəyərləndirirdi.
      “Masallı Ziyalıları” İctimai Birliyinin sədri Qardaş Fətullayev qeyd edib ki, ilk dəfə Heydər Əliyevin 23 may 2001-ci il tarixli sərəncamı ilə “Dünya Azərbaycanlılarının I Qurultayının keçirilməsi haqqında” qərar qəbul olunub. Ardınca, 2002-ci ilin dekabrında qəbul edilmiş “Xarici ölkələrdə yaşayan azərbaycanlılarla bağlı dövlət siyasəti haqqında” Azərbaycan Respublikasının Qanunu isə bu sahədə prioritet istiqamətləri və hüquqi prinsipləri müəyyənləşdirib.
      Masallı Tarix-Diyarşunaslıq Müzeyinin direktoru Əntiqə Tağıyeva diqqətə çatdırıb ki, Həmrəylik Günü həm ölkə daxilində milli və mənəvi bütövlüyün qorunmasında, həm də xaricdə yaşayan soydaşlarımız arasında bağların möhkəmləndirilməsində mühüm rol oynayır. Bu gün bir daha sübut edir ki, milli birlik yalnız tarixi xatirə deyil, gələcəyə doğru atılan strateji addımların əsas dayağıdır.
     Masallı Dövlət Regional Kollecinin direktor müavini Dilarə Hüseynova söyləyib ki, Qarabağın azad edilməsi, dövlətimizin beynəlxalq aləmdə möhkəmlənən mövqeyi, mədəni dirçəlişimiz və iqtisadi inkişafımız kimi nailiyyətlərin kökündə məhz xalqın həmrəyliyi dayanır.
          Azərbaycan Jurnalistlər Birliyi Masallı rayon təşkilatının sədri Akif Ağayev həmrəyliyin cəmiyyətə ötürülməsi və ictimai şüurun formalaşdırılması istiqamətində medianın rolundan danışıb. O, əlavə edib ki, 44 günlük Vətən müharibəsi dövründə sosial mediada Azərbaycanın dəstəklənməsi üçün aparılan kampaniyalar və haqq səsimizin, ədalət savaşımızın dünyaya çatdırılması xalqımızın həmrəyliyini nümayiş etdirirdi. Bu, eyni zamanda milli birliyimizin və mənəvi bütövlüyümüzün rəmzi idi.
       QMİ-nin Masallı rayon üzrə qazısı Rəşid Talıbov bildirib ki, bu əlamətdar gün, harada yaşamasından asılı olmayaraq, millətinə bağlı, dilini, mədəniyyətini və dövlətini sevən milyonlarla soydaşımızı bir araya gətirən ən mühüm mənəvi körpüdür. Belə günlər böyüklərimizinı, ağsaqqallarımızın xeyir-dualarını, xalqımızın birlik çağırışını daha da gücləndirir.
        Konfransda Həmrəylik Gününün siyasi, sosial və tarixi əhəmiyyəti barədə geniş bəhs edilib, iştirakçıları maraqlandıran suallar cavablandırılıb.

Akif VAQİFOĞLU