Kitablar səltənətinin incisi: “Yeddi gözəl”

(dahi Nizaminin 885 illiyinə)

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasında Mədəniyyət Konsepsiyasının icrası ilə əlaqədar həyata keçirilən “Kitablar səltənətinin inciləri” adlı mütaliə silsiləsində izləyicilərə Azərbaycan xalqının bəşər mədəniyyəti xəzinəsinə bəxş etdiyi böyük ədəbi şəxsiyyətlərdən biri olan görkəmli şair və mütəfəkkir Nizami Gəncəvinin “Yeddi gözəl” poeması təqdim olunur. 
Nizami Gəncəvinin adı dünya ədəbiyyatının ən görkəmli klassikləri sırasında çəkilir. Dahi Nizami Gəncəvi 1141-ci ildə Gəncədə anadan olub. Şairin adı – İlyas, “Nizami” isə onun təxəllüsü idi – “nizam verən, qaydaya salan” deməkdir.
Bu il böyük şairimizin 885 illik yubileyi tamam olur.
Azərbaycan ədəbiyyatı Nizamiyə qədər mürəkkəb və şərəfli bir yol keçmişdir. Azərbaycanın Məhsəti Gəncəvi, Həmədani, Xaqani, Yaxın Şərqin Firdovsi, Ömər Xəyyam və başqa böyük şairlərin qoyduğu ədəbi irsini Nizami o vaxtadək görünməmiş bir yüksəkliyə çatdırmış, öz yaradıcılığı ilə şeiriyyata yeni ruh, yeni nəfəs vermişdir. Nizaminin “Xəmsə” adlandırılan beş poemasından 4-sü olan “Yeddi gözəl” əsərində “insan necə olmalıdır”, sualına lirik formada cavab vermişdir. İnsanın özünü dərk etməsini, xeyirlə şəri ayırd etməsini, çətin sınaqlar axarında düzgün yol seçməsini bacarmasını dəyərləndirən şair oxucuları həyata, insanlığa, elmə çağırır.
Hər kim öyrənməyi bilməyirsə ar,
Sudan dürr, daşdan da gövhər çıxardar.
Ancaq öyrənməyi ar bilən insan
Məhrumdur dünyada bilik almaqdan.
Çox iti zehinlər yatan oldular,
Axırda saxsı qab satan oldular,
Təlimə həvəskar çox korazehin
İqlimlər qazisi olmadı? Deyin.
Təlimdir düzəldən itləri sap tək,
Olmazmı cəhd etsə bir insan mələk?
“Yeddi gözəl”də əsas surət Bəhram Gurdur. O, ov edən, əylənən, yeddi gözəlin eşqi ilə xəyala dalmağı sevən biri kimi Yəməndə kef içində yaşayır. Xalqın inamını və məhəbbətini qazanan lakin vəzifəsini sadəcə, yeyib-yatmaqda görən Bəhram eyş-işrətdən o zaman ayılır ki, xəzinə boşalıb, ölkə dağılıb, xalq ona düşmən kimi baxır. Çin xaqanı onu müharibə ilə təhdid edir. Şah eyş-işrət və gözəl vaxt keçirmək üçün tikdirdiyi yeddi gümbəzli qəsrdən əl çəkir. 
Kitabxananın Fəxri oxucusu, yazıçı Şahzadə İldırım təqdim etdiyi videoçarxda  dahi Nizaminin “Yeddi gözəl” poeması haqqında maraqlı məlumat verir. Məzmun və mənaca ecazkar bir əsər olan bu poemanı oxuyun, əziz kitabsevərlər.

Videoçarx kitabxananın YouTube kanalında verilib: