Ağcabədidə Ümummilli liderin doğum günü təntənəli şəkildə qeyd olundu +FOTOLAR

Mayın 10-da Ağcabədi Rayon İcra Hakimiyyəti, Yeni Azərbaycan Partiyası Ağcabədi rayon təşkilatı və Qarabağ Regional Mədəniyyət İdarəsinin birgə təşkilatçılığı ilə Ümummilli Lider Heydər Əliyevin anadan olmasının 103-cü ildönümünə həsr olunmuş tədbir keçirilib.

AZpress.AZ-ın bölgə müxbiri xəbər verir ki, əvvəlcə  Ağcabədi rayon Heydır Əliyev Meydanında Ulu Öndərin abidəsi ziyarət olunub, önünə gül dəstələri düzülüb. Daha sonra tədbir iştirakçıları mədəniyyət mərkəzinin foyesində təşkil olunan sərgiyə baxış keçiriblər.

Mərkəzin konfrans zalında davam edən tədbirdə əvvəlcə sənədli film nümayiş olunub. Moderatorun açılış nitqindən sonra Azərbaycan Respublikasının Dövlət Himni səsləndirilib, Ümummilli Lider Heydər Əliyevin və Vətən uğrunda canından keçən şəhidlərin xatirəsi bir dəqiqəlik sükutla yad edilib.

Tədbirdə Ağcabədi Rayon İcra Hakimiyyətinin başçısı Rafil Hüseynov, Yeni Azərbaycan Partiyası Ağcabədi rayon təşkilatının sədri Rövşən Əhmədov və digərləri çıxış edərək Ulu öndər Heydər Əliyevin zəngin dövlətçilik fəaliyyəti, Azərbaycan xalqı və dövləti qarşısındakı misilsiz xidmətləri barədə ətraflı danışıblar. Çıxışlarda Ulu Öndərin siyasi kursunun bu gün Prezident İlham Əliyev tərəfindən uğurla davam etdirildiyi vurğulanıb.

Tədbir çərçivəsində Aprel döyüşləri şəhidi gizir Dilsuz Qarayevin ölümündən sonra təltif olunduğu “Vətən uğrunda” medalı ailəsinə təqdim olunub. İştirakçılar bu anı ayaq üstə alqışlayıblar. 

Yekunda Yeni Azərbaycan Partiyasına yeni qəbul olunan üzvlərə partiya vəsiqələri təqdim edilib, Ümummilli Liderin anadan olmasının  103-cü ilinə həsr olunan müxtəlif yarışların qalibləri fəxri fərman və hədiyyələrlə mükafatlandırılıblar.

Tədbirin bədii hissəsində Qarabağ Regional Mədəniyyət İdarəsinin hazırladığı konsert proqramı təqdim olunub. Proqramda Ulu Öndərin sevdiyi Azərbaycan musiqiləri, muğam nümunələri və vətənpərvərlik ruhlu ifalar səsləndirilib.