Ərdoğan Trampla telekonfrans zamanı İranla danışıqları dəstəklədiyini bildirib

Türkiyə Prezidenti Rəcəb Tayyib Ərdoğan ABŞ Prezidenti Donald Tramp, Bəhreyn Kralı Həməd bin İsa Əl-Xəlifə, BƏƏ Prezidenti Şeyx Məhəmməd bin Zayed Əl-Nəhyan, Qətər Əmiri Şeyx Təmim bin Həməd Əl-Sani, Misir Prezidenti Əbdülfəttah əs-Sisi, Səudiyyə Ərəbistanı vəliəhdi Məhəmməd bin Salman, İordaniya Kralı II Abdullah, Pakistanın Baş Qərargah rəisi Asim Munir və ABŞ Prezident Administrasiyasının üzvləri ilə telekonfrans keçirib.

Bu məlumatı Türkiyə Prezident Administrasiyasının Kommunikasiya İdarəsi yayıb.

Görüş zamanı İran və Yaxın Şərqdəki hadisələr müzakirə olunub. Türkiyə Prezidenti Ankaranın həmişə problemlərin dialoq və diplomatiya yolu ilə həll edilməsinin tərəfdarı olduğunu bildirib. O, İranla diplomatik prosesin ABŞ Prezidentinin qeyd etdiyi səviyyəyə çatmasından məmnunluğunu ifadə edib və mümkün razılaşmanın regionda sabitliyə töhfə verəcəyini və gəmilərin Hörmüz boğazından sərbəst keçməsini təmin edəcəyini, bunun da qlobal iqtisadiyyata müsbət təsir göstərəcəyini vurğulayıb.

Danışıqlar prosesinə töhfə verən ölkələrə təşəkkür edən Rəcəb Tayyib Ərdoğan, Türkiyənin İranla mümkün razılaşmanın həyata keçirilməsi mərhələsində hərtərəfli dəstək verməyə hazır olduğunu bildirdi. O, əlavə etdi ki, Türkiyə regionda sülhün bərqərar olması üçün səylərini davam etdirir və zamanla İranın nüvə məsələsi kimi mürəkkəb məsələlərdə belə məqbul həll yollarının tapılacağına inanır.

Rəcəb Tayyib Ərdoğan həmçinin vurğuladı ki, Türkiyə region ölkələrinin bir-birinə təhlükə yaratmadığı yeni bir dövrün başlanğıcını arzulayır və ədalətli sülhdə heç kimin məğlub olmayacağına inanır.