Bakıda "Nine Senses Fest 2026" Beynəlxalq Festivalı start götürdü

Bakıda Heydər Əliyev Fondunun vitse-prezidenti, Azərbaycan Yoqa Federasiyasının prezidenti və Nine Senses Art Center-in təsisçisi Leyla Əliyevanın himayəsi ilə keçirilən beynəlxalq şəxsi inkişaf, sağlamlıq və yaradıcılıq festivalı Nine Senses Fest 2026-nın rəsmi açılışı baş tutub.

AZpressTİMES.info xəbər verir ki, Festival Azərbaycan və xarici ölkələrdən yoqa, meditasiya, psixologiya, incəsənət, bədən təcrübələri və şəxsi inkişaf sahələrində fəaliyyət göstərən aparıcı mütəxəssisləri bir araya gətirib. Festivalın ilk günü ərzində The Club Port Baku və JW Marriott məkanlarında onlarla master-klass, mühazirə və praktiki sessiyalar təşkil olunub.

İştirakçılar hatha yoqa, kundalini yoqa, çiqonq, sound healing, neyrogimnastika, müxtəlif bədən təcrübələri və meditasiya sessiyalarında iştirak etmək imkanı əldə ediblər. Vadim Popov, Lev İvanov, Nandan Qautam, Darpan, Yelena Seselkina və digər tanınmış ekspertlərin çıxışları iştirakçılar tərəfindən böyük maraqla qarşılanıb.

Günün kulminasiya nöqtəsi festivalın rəsmi açılış mərasimi, həmçinin Aura RA tərəfindən təqdim olunan “Transformasiya” adlı immersiv meditativ performans olub.

Festivalın açılış mərasimində çıxış edən Nine Senses Art Center-in akademik direktoru Natalya Jukova müasir insan üçün həyatın sürətli ritmi ilə daxili harmoniya arasında tarazlığın qorunmasının xüsusi əhəmiyyət daşıdığını vurğulayıb.

“Nine Senses qədim biliklərin müasir təcrübələrlə qovuşduğu, insanların dayanaraq öz daxili səslərini eşidə bildiyi və daha şüurlu, harmonik həyata doğru addım atdığı bir məkandır. Bakıda müxtəlif ölkələrdən, mədəniyyətlərdən və ənənələrdən olan insanları inkişaf, sağlamlıq və daxili yüksəliş arzusu ətrafında bir arada görməkdən böyük məmnunluq duyuruq”, – deyə Natalya Jukova bildirib.

Festival 13 və 14 iyun tarixlərində Sea Breeze Resort ərazisində davam edəcək.

13 iyun tarixində festival iştirakçılarını proqramın ən çox gözlənilən qonaqları ilə görüşlər gözləyir. Gün ərzində Lev İvanovun “Bütün gün üçün enerji və güc”, İmram Kriyanın “Həyat elmi” mövzusunda master-klası, eləcə də Pavel Piskaryovun “Neyroağac. Köklərdən inkişafa doğru” praktiki sessiyası keçiriləcək. Axşam isə İmram Kriyanın satsanqı və konsert proqramı baş tutacaq.

14 iyun tarixində festivalın əsas hadisəsi Şərq mənəvi ənənələrinə həsr olunmuş Sufizm Günü olacaq. Proqram çərçivəsində sufi təcrübələri, səma mərasimləri, zikrlər, Mövlana Ruminin poeziyası, Pavel Piskaryovun immersiv art-performansı və Türkiyədən gələn musiqiçi Özgür Babanın canlı çıxışı təqdim ediləcək.

Festivalın yekun proqramı bağlanış mərasimi, Çingiz Mustafayevin “STATE of SOUND” adlı böyük konsert proqramı və Marat Niqmatulinin “SBUDETSYA!” adlı konsert çıxışı ilə tamamlanacaq.

Bu il Nine Senses Fest 2026 80-dən çox spiker və eksperti bir araya gətirərək iştirakçılara sağlamlıq, şüurlu həyat tərzi, incəsənət və şəxsi inkişaf sahələrində dünyanın ən qabaqcıl təcrübələri ilə tanış olmaq imkanı yaradır.

Nine Senses Fest 2026 beynəlxalq festivalı 12–14 iyun tarixlərində Bakı şəhərində keçirilir və üç gün ərzində iştirakçılara sağlamlıq, şüurlu həyat tərzi, incəsənət və şəxsi inkişaf sahələrində zəngin proqram təqdim edir.

Fotolar: Mahir Əhmədov