Britaniya səfiri: "Bakı ilə müdafiə münasibətləri indiyə qədər ən güclü mərhələdədir"

"Cəmi dörd həftə əvvəl Azərbaycana gəlsəm də, Bakıya ilk səfərim 1999-cu ildə olub. Ölkənin o vaxtdan bu günə qədərki inkişafı həqiqətən təsirlidir."

AZpressTİMES.info-nun APA-ya istinadən verdiyi məlumata görə, bu barədə Böyük Britaniyanın Azərbaycandakı səfiri Duncan Norman Kral III Çarlzın doğum gününə həsr olunmuş tədbirdə bildirib.

O qeyd edib ki, bugünkü Azərbaycan qlobal dünya ilə sıx bağlı olan dinamik, müasir bir ölkədir:

"Azərbaycan həqiqətən də əhəmiyyətli bir fürsət dövrünü yaşayır. Bir nəsil ərzində ilk dəfə olaraq Cənubi Qafqazda davamlı sülhün bərqərar olması üçün real fürsət yaranıb. Sülh regionda genişlənmiş ticarət, investisiya və nəqliyyat əlaqələrinə yol açacaq. Əsas çətinlik bu sülhün dönməz olmasını təmin etməkdir.

Lakin, şahidi olduğum bütün dəyişikliklər arasında bir şey dəyişməz olaraq qalıb: Azərbaycan xalqının səmimiyyəti və qonaqpərvərliyi.

Böyük Britaniya və Azərbaycan arasında otuz ildən çox müddət ərzində inkişaf edən və hazırda Strateji Tərəfdaşlıq səviyyəsinə çatan əməkdaşlığı davam etdirməkdən böyük şərəf duyuram."

Diplomat qeyd edib ki, iki ölkə arasında münasibətlər enerji sektorundakı əməkdaşlıqla başlayıb:

"BP-nin əsas investisiyaları Azərbaycanın müasir iqtisadi inkişaf hekayəsinin formalaşmasına töhfə verib və biz bu əməkdaşlığı inkişaf etdirməyə davam edirik.

Tərəfdaşlığımız yalnız enerji ilə məhdudlaşmır. Müdafiə münasibətlərimiz indiyə qədər ən güclü dövrünü yaşayır.

Qanunsuz malların sərhəddən kənar qaçaqmalçılığına qarşı mübarizə aparmaq üçün sıx əməkdaşlıq edirik.

Britaniya şirkətləri aviasiya, infrastruktur, maliyyə və süni intellekt kimi sektorlarda fəal iştirak edirlər.

Biz Qarabağdakı mina təmizləmə əməliyyatını dəstəkləməkdən, yerli icmaların bərpasına və canlanmasına töhfə verməkdən qürur duyuruq.

Təhlükəsizlik və iqtisadi əməkdaşlıqla yanaşı, əlaqələrimiz də möhkəmlənməyə davam edir."