Rusiyanın LGBT ilə əlaqəli iş üzrə ilk hökmü Orenburqda verilib

Rusiyanın Orenburq şəhərinin Mərkəzi Rayon Məhkəməsi yerli barın sahibini, menecerini və bədii rəhbərini qadağan olunmuş hərəkatla bağlı tədbirlər təşkil etdiklərinə görə məhkum edib.

Bu barədə regionun ümumi yurisdiksiya məhkəmələrinin birgə mətbuat xidməti məlumat verib.

Məhkəmə müəyyən edib ki, təqsirləndirilən şəxslər (Başqırdıstanın iki sakini və Orenburqun bir sakini) beynəlxalq LGBT ictimai hərəkatının ekstremist təşkilat kimi tanındığını və Rusiya Federasiyasında fəaliyyətinin qadağan edildiyini bilərək, "gecə klubu idarə etmək adı altında qeyri-ənənəvi cinsi oriyentasiyalı şəxslərlə əlaqələrinin nümayiş etdirilməsi kimi ortaq mövzu ilə birləşən tədbirlər təşkil ediblər".

Cinayətkarlar Rusiya Cinayət Məcəlləsinin 282.2-ci maddəsi (ekstremist təşkilatın təşkili və fəaliyyətində iştirak) ilə ittiham olunublar. Təqsirləndirilən şəxslərdən heç biri günahını boynuna almayıb.

Məhkəmə onları ümumi rejimli cəza koloniyasında 2 il 3 aydan 7 ilə qədər müddətə azadlıqdan məhrum edib, 8 aydan 1 il 6 aya qədər müddətə azadlıqlarını məhdudlaşdırıb və bar təşkilatçılarına müəyyən fəaliyyətlərlə məşğul olmağı qadağan edib.

Bundan əlavə, məhkəmə müəssisənin sahibinə ekstremist fəaliyyətdən əldə edilən 1 milyon rubldan çox gəlir ödəməyi əmr etdi.

Bəyanatda qeyd olunur ki, "Bu cinayət işi Rusiya Federasiyasında bu ekstremist təşkilatın fəaliyyətinin qarşısının alınması ilə bağlı açılan ilk cinayət işidir".

Xatırladaq ki, 2023-cü ilin noyabr ayında Rusiya Ali Məhkəməsi Ədliyyə Nazirliyinin Beynəlxalq LGBT Hərəkatını ekstremist kimi tanımaq və ölkədə qadağan etmək iddiasını təmin etdi. 2024-cü ilin mart ayında Rosfinmonitoring LGBT hərəkatını ekstremist fəaliyyət və ya terrorizmlə əlaqəli olduğu bilinən şəxslər və təşkilatlar siyahısına əlavə etdi.