Dünya liderlərinin ilk peşələri nə olub?

Bir vaxtlar onlar da tələbə idilər və imtahan qabağı narahatçılıq yaşayırdılar. Lakin illər sonra onlar siyasi aləmdə ən önəmli fiqurlara çevrildilər, dövlətlərinin, xalqlarının qarşısında imtahan verdilər. 

Azərbaycan Respublikasının Prezidenti İlham Əliyev siyasi fəaliyyətə başlamazdan əvvəl 1985-ci ildə namizədlik dissertasiyası müdafiə edərək tarix elmləri namizədi alimlik dərəcəsi almışdır. 1985-1990-cı illərdə Moskva Dövlət Beynəlxalq Münasibətlər İnstitutunda müəllim işləyib. 1991-1994-cü illərdə özəl biznesdə çalışıb. Bir sıra sənaye və ticarət müəssisələrinə rəhbərlik etmişdir.

Rusiya prezidenti Vladimir Putin 1991-ci ildə Sankt-Peterburqda siyasi karyerasına başlamaq üçün istefa verməzdən əvvəl DTK-da 16 il xarici kəşfiyyat zabiti kimi çalışıb, polkovnik-leytenant rütbəsinə qədər yüksəlib.

ABŞ-ın 46-cı prezidenti Cozef Bayden siyasi vəzifəyə gəlməzdən əvvəl hüquqşünas kimi təhsil alıb. Karyerasına 1969-cu ildə Delaver Vəkillər Kollegiyasına ilk dəfə qəbul olanda başlamışdır.

2019-cu ildən Ukraynanın altıncı prezidenti vəzifəsini icra edən Vladimir Zelenski siyasətçi olmamışdan əvvəl komediyaçı və aktyor idi. Ən məşhur filmləri “8 ən yaxşı tarix”, “Mən, sən, o, o”, “Xalqın xidmətçisi-2”dir.

Türkiyə Respublikasının Prezidenti Rəcəb Tayyib Ərdoğan jurnalistlərə müsahibəsində uşaq vaxtı simit və su satdığını deyib. Bir müddət futbolla da maraqlanan Ərdoğan siyasi fəaliyyətinə lisey illərində Milli Türk Tələbələri Birliyinə üzv olmaqla başlayıb.

İran İslam Respublikasının lideri İbrahim Rəisi 1981-ci ildə Kərəc prokuroru təyin edilib. Daha sonra Həmədanın prokuroru təyin edilib və eyni zamanda hər iki vəzifəni icra edib. Daha sonra 4 ay sonra Həmədan vilayətinin prokuroru təyin edilən Rəisi siyasi səhnəyə çıxdı.