Rusiyanın Ukraynaya müdaxiləsi zamanı tərəflərin itkiləri

Ukraynada demək olar ki, 24 min insan itkin düşmüş hesab olunur. Bu gün bu rəqəm (itkin düşənlər – red.) 23 min 876 nəfərdir. 

Baş ofisi Cenevrədə yerləşən İsveçrənin və dünyanın ən qədim humanitar təşkilatı olan Beynəlxalq Qızıl Xaç Komitəsinin (BQXK) məlumatına görə, iki il əvvəl Rusiyanın genişmiqyaslı işğalından sonra Ukraynada 23 mindən çox insan itkin düşüb. BQXK indi onların taleyini öyrənməyə çalışır.

2024-cü ilin yanvar ayının sonuna olan məlumata görə, BQXK 8000-ə yaxın insanın taleyini aydınlaşdırmağa kömək edib, onların ailələrinə həmin şəxslərin taleyi və ya harada olması barədə məlumat verib. Son iki il ərzində BQXK-ya Ukrayna və Rusiyadan itkin düşmüş ailə üzvlərinin tapılması üçün kömək istəyən 115 mindən çox müraciət daxil olub.

Bu barədə BQXK-nın 19 fevral 2024-cü il bazar ertəsi yaydığı bəyanatda deyilir. İtkin düşmüş şəxslərin axtarışını Beynəlxalq Qızıl Xaç Komitəsinin (BQXK) Rusiya və Ukrayna arasında 2022-ci ilin martında xüsusi olaraq açılmış silahlı münaqişə ilə bağlı məsələlər üzrə Mərkəzi Axtarış Agentliyinin Bürosu həyata keçirir.

BQXK bir daha qeyd edib ki, ailələrin itkin düşmüş yaxınlarının taleyini bilmək hüququ beynəlxalq humanitar hüquqda təsbit olunub. İstənilən beynəlxalq silahlı münaqişədə tərəflər insanların itkin düşməsinin qarşısını almağa və yaxınlarını axtaran ailələrə baş verənlər barədə məlumat verilməsini təmin etməyə borcludurlar.