23 noyabr 2023-cü il tarixində Üzeyir Hacıbəyli adına Bakı Musiqi Akademiyasında dünyaşöhrətli bəstəkar Arif Məlikovun 90 illik yubileyinin festivalı çərçivəsində BMA-nın “Musiqi nəzəriyyəsi” və “İxtisas Fortepiano” kafedralarının təşkilatçılığı ilə konsert-konfrans keçirildi. 

Konfransda BMA-nın “Musiqi nəzəriyyəsi” kafedrasının müdiri, professor Könül Nəsirova ön sözlə çıxış edərək, bütün qonaqları salamladı və konsert-konfransı açıq elan etdi. 

Tədbirdə İmruz Əfəndiyeva və bəstəkarın tələbələri olmuş BMA-nın dosenti Gülnarə Məmmədova, gənc bəstəkar Tamilla Əhədova A.Məlikovla bağlı xoş xatirələrini hər kəslə bölüşdü, görkəmli musiqiçinin mükəmməl müəllim olmaqdan savayı, həm də yüksək insani keyfiyyətləri özündə cəmləşdirən bir şəxsiyyət olduğunu qeyd etdilər. 

Bədii hissədə Əməkdar artist Aleksey Miltıx, Beynəlxalq müsabiqələr laureatı Emil Malıqin, Azərbaycan Dövlət Akademik Musiqili Teatrının solisti Yuliya Heydərova, sənətşünaslıq üzrə fəlsəfə doktoru, BMA-nın baş müəllimi Alyona İnyakina, Ofeliya Axundova və BMA-nın “İxtisas Fortepiano” kafedrasının tələbələri Zəhra Cahan Şıxəliyeva, Kübra Həşimli, Nurel Kərimova, Fidan Əmirova parlaq ifalarını dinləyicilərə təqdim etdilər. 

İstedadlı musiqiçilərin ifasında Arif Məlikovun “Məhəbbət əfsanəsi” baletindən Adajio, “Ötəri anlar”, “Mavi gözlü dev”, “Gözləyin..”, “Ağır vals”, “Skerso”, “Komdenin göz yaşları”, Prelüd N.3, “Budapeşt” mahnısı səsləndirildi.

Konfransda isə “Musiqi nəzəriyyəsi” kafedrasının tələbələri Pakizə Mustafazadə, Jalə Quliyeva, Aysel Tağıyeva, Züleyxa Murtuzova görkəmli bəstəkarın çoxşaxəli yaradıcılığını əks etdirən maraqlı mövzularla  çıxış etdilər (tələbələri prezentasiya üçün BMA-nın baş müəllimi Alyona İnyakina hazırlamışdır).

Qeyd edək ki, tədbir çərçivəsində

“Musiqi nəzəriyyəsi” kafedrasının dosenti Nigar Rəhimova və onun tələbəsi Nəzrin Quliyevanın müəllifləri olduğu “Arif Məlikovun səkkizinci simfoniyasının musiqisində travmanın təcəssümü” kitabının təqdimatı keçirildi. 

Sonda  “Tarix-nəzəriyyə” fakültəsinin dekanı, professor Gülzar Mahmudova da görkəmli şəxsiyyətlə bağlı fikirlərini, xatirələrini konfrans iştirakçıları ilə bölüşdü. 

Görkəmli bəstəkarın 90 illik yubileyinə həsr olunmuş konsert-konfrans tədbiri hər kəs tərəfindən böyük maraqla qarşılandı.