Şəmkirdə Ulu Öndərin anadan olmasının 101-ci ildönümü münasibətilə konsert keçirilib

09 may 2024-cü il tarixində Şəmkir şəhərində Ulu Öndər Heydər Əliyevin anadan olmasının 101-ci ildönümü münasibətilə orqan musiqisindən ibarət konsert proqramı təqdim edildi.

Şəmkir şəhəri Alman Lüteran kilsəsində, Şəmkir Rayon İcra Hakimiyyəti və Üzeyir Hacıbəyli adına Bakı Musiqi Akademiyasının təşkilatçılığı ilə “Fortepiano, orqan və klavesin” kafedrasının professoru, Əməkdar incəsənət xadimi Tahirə Yaqubovanın bədii rəhbəri olduğu konsert proqramında BMA-nın məzunu, beynəlxalq müsabiqələr laureatı Nigar Məmmədova, BMA-nın II kurs magistr tələbəsi Gülbacı Muradova və bakalavr tələbəsi Əliheydər Aydın iştirak etdilər. Həmçinin tədbirdə Heydər Əliyevin həyat və fəaliyyətindən bəhs edən fotoşəkillərdən ibarət sərgi nümayiş olundu. 

 Şəmkir Rayon İcra Hakimiyyətinin başçısı Rəşad Tağıyev, aparatın əməkdaşları, hüquq mühafizə orqanlarının, idarə, müəssisə və təşkilatların rəhbərləri, rayon ictimaiyyətinin nümayəndələri və I Qarabağ müharibə veteranları qonaqlar qismində təşrif buyurmuşlar.

Tədbirdə Ulu Öndər və torpaqlarımızın azadlığı uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edildi. 

BMA-nın “Fortepiano, orqan və klavesin” kafedrasının  müdiri, professor Afaq Rüstəmova konsertə giriş sözü ilə başladı. O, Dahi şəxsiyyət Heydər Əliyevin 101-ci il dönümünə həsr olunan konsertin həmçinin 9 may faşizm üzərində qələbə gününə təsadüf etməsini söylədi. 

A.Rüstəmova həmçinin Şəmkir Rayon İcra Hakimiyyətinin başçısı Rəşad Tağıyevə, BMA-nın rektoru, professor Fərhad Bədəlbəyliyə bu tədbirin keçirilməsi üçün göstərdikləri xidmətlərə görə öz təşəkkürünü bildirdi. 

Tədbirdə çıxış edən Şəmkir Rayon İcra Hakimiyyətinin başçısı Rəşad Tağıyev öz növbəsində bu tədbirin təşkil olunmasında böyük xidmətləri olan Bakı Musiqi Akademiyasının rektoru, Xalq artisti, professor Fərhad Bədəlbəyliyə, Əməkdar incəsənət xadimi, professor Tahirə Yaqubovaya, “Fortepiano, orqan və klavesin” kafedrasının müdiri Afaq Rüstəmovaya xüsusi minnətdarlığını bildirdi. O, Ümummilli lider, dahi şəxsiyyət Heydər Əliyevin Azərbaycan dövlətinin qurucusu kimi müstəsna xidmətlərindən bəhs etdi. 

Konsert proqramında Avropa və Azərbaycan bəstəkarlarının əsərləri səsləndirildi. Konsert Azərbaycan Respublikasının Dövlət Himni (orqan üçün işləyəni: T.Yaqubova) ilə başa çatdı. 

Sonda xatirə şəkilləri çəkdirildi.