Azərbaycan Fotoqrafiya Federasiyası beynəlxalq foto təşkilata üzv oldu

Azərbaycan foto sənətinin inkişafına və təbliğinə töhfə verən «Azərbaycan Fotoqrafiya Federasiyası» ictimai birliyi beynəlxalq foto təşkilata üzv qəbul edilib. 
Cari ilin dekabr ayında Beynəlxalq Foto Sənəti Federasiyasının (FIAP) İdarə Heyətinin qərarı ilə Azərbaycan Fotoqrafiya Federasiyası bu təşkilatın üzvləri sırasına daxil olub. Bununla da, Azərbaycanı bu nüfuzlu təşkilatda təmsil edən yerli foto təşkilatların sayı ikiyə çatıb. 2017-ci ildən bu günə kimi ölkəmizi həmin qurumda «Gilavar Foto Klubu» icimai birliyi təmsil edirdi.
Beynəlxalq Foto Sənəti Federasiyası 1946-cı ildə yaranıb və dünyada UNESCO tərəfindən tanınmış yeganə fotoqrafiya təşkilatıdır. Yüzdən artıq ölkənin foto təşkilatlarını bir yerə toplayan FIAP, hazırda dünyanın ən böyük və nüfuzlu foto təşkilatı hesab olunur. Bu qurumun üzvlüyünə qəbul edilmiş federasiya və klublar xüsusi statusa, fotoqraflar isə ömürlük fəxri adlara layiq görülür.
Qeyd edək ki, «Azərbaycan Fotoqrafiya Federasiyası» ictimai birliyi 1 dekabr 2022-ci ildə təsis edilib. Hazırda Birliyin sənədləri dövlət qeydiyyatına alınması məqsədilə Ədliyyə Nazirliyinə təqdim edilib.