Şəhid Zaur Ağalının xatirəsi anılıb 

Yaşasaydı 27 yaşı tamam olacaqdı 

11 dekabr 2023-cü il tarixdə Vətən müharibəsi şəhidi, “Vətən uğrunda”, “Cəbrayılın azad olunmasına görə”, “Qubadlının azad olunmasına görə” medallı əsgər Zaur Kamil oğlu Ağalının (11.12.1996-22.10.2020) anadan olmasının 27-ci ildönümündə xatirəsi ehtiramla anılıb. 

ƏƏSMN-nin tabeliyində DSMF-nin 1 saylı Lənkəran-Astara regional filalının müdiri Uğur Qurbanzadə və Sosial Xidmət Agentliyinin regional filalının müdiri Ramin Hüccətov, Lənkəran ŞİHB-nın İstisu qəsəbə inzibati ərazi dairəsi üzrə nümayəndəsi Asif Əliyev  şəhdin atası Kamil Ağayevlə birlikdə şəhidin məzarını ziyarət edib, önünə tər güllər qoyublar.

Məlumat üçün bildirək ki, Zaur Ağalı Lənkəran rayonunun İstisu qəsəbəsində anadan olub. 2014-ci ildə qəsəbədəki R.Qurbanov adına orta məktəbi bitirib. 2015-ci il, aprel ayında həqiqi hərbi xidmətə yollanıb, 2016-ci ilin oktyabrında xidməti başa vurub.

2017-ci ildə ailə həyatı qurub, 2018-ci il, iyulun 7-də bir oğlan övladı dünyaya gəlib.

Azərbaycan Silahlı Qüvvələrinin müddətli həqiqi hərbi xidmət hərbi qulluqçusu olan Zaur Ağalı 2020-ci il sentyabrın 27-də Azərbaycan və Ermənistan arasında başlanan 2-ci Qarabağ müharibəsi zamanı Cəbrayıl, Qubadlı döyüşləri və Zəngilanın azadlığı uğrunda gedən döyüşlərdə vuruşub. 

Zaur Ağalı Qubadlı istiqamətində qəhrəmancasına vuruşaraq şəhid olub.

Oktyabrın 22-də yaşadığı qəsəbə qəbiristanlığında, böyük izdihamla dəfn olunub.