Pirallahıda kitab təqdimatları olub

Sumqayıtdan şəhid anaları ilə birlikdə Pirallahıda qonaq olan şairə ilk olaraq 168 saylı məktəbə üz tutub. Qonaqlar məktəb rəhbərliyi tərəfindən gözəl qarşılanıb. Şəhid Tacəddin İsmayılzadənin adını daşıyan sinif otağı ilə tanış olublar. Daha sonra isə məktəb rəhbərliyi şəhid analarını çay süfrəsinə qonaq edib. Analar biraz dincəldikdən sonra məktəbin akt zalında möhtəşəm bir tədbir baş tutub. Şəhid analarını şagirdlər ayaq üstə alqışlayaraq qarşılayıblar. Daha sonra körpə fidanlar hər şəhid ailəsinə bir qızıl gül təqdim edərək sevgilərini göstəriblər. Tədbiri açıq elan edən məktəbin direktoru Elnur Bayramov bildirib ki, 168 saylı məktəbin bütün kollektivi hər zaman şəhidlərimizlə bağlı tədbirlərdə fəal iştirak edir, tez-tez şəhid ailələrini ziyarət edirlər və daima şagirdlərə şəhidlərimiz haqqında geniş məlumatlar verilərək, qəhrəmanlıqlarından bəhs olunur. Daha sonra tədbir qonaqların çıxışları və şagirdlərin hazırladığı maraqlı kompozisiyalar ilə davam edib. Tədbirin sonunda şairə Esmira Günəş çıxış edərək, məktəb kollektivinə təşəkkürünü bildirib və "44 günün Sumqayıt qəhrəmanları", "Şimşəkdən dənizə", "Cəsur Qəhrəmanlar" kitablarını məktəbin Kitabxana fonduna hədiyyə edib. Tədbir xatirə şəkilləri ilə yekunlaşdırıldıqdan sonra qonaqlar Pirallahı kitabxanasına üz tutublar. Kitabxananın rəhbəri Zülfüyyə xanım qonaqları böyük sevgi ilə qarşılayıb. Şəhidlərin xatirəsinə həsr olunan tədbirdə İcra nümayəndəsi, şəhid ailələri, kitabxana kollektivi və məktəblilər iştirak ediblər. Zülfüyyə xanım bildirib ki, şairə Esmira Günəşin kitabları nəinki kitabxana oxucuları, eləcə də bütün xalq üçün faydalı və önəmli kitablardır. Piralları kitabxanası da  tədbirlər zamanı şairənin yaradıcılığına sevə-sevə müraciət edir. Sumqayıtdan gələn qonaqlar kitabxanada tədbir yekunlaşdıqdan sonra Pirallahı Şəhidlər xiyabanına üz tutaraq, şəhidlərin məzarlarını da ziyarət etdikdən sonra Sumqayıta qayıdıblar.

Esmira Günəş