Luka Yoviç Serbiyanı son anda xilas edib

Almaniyada futbol üzrə keçirilən Avro-2024-də daha bir oyun başa çatəb. Söhbət C qrupunun Münhen şəhərindək "Allianz Arena"da baş tutan Sloveniya - Serbiya matçından gedir. Gərgin mübarizə şəraitində keçən bu oyunda qalib aşkarlanmayıb. Tərəflər hərəyə bir qol vurmaqla meydanı sülh şəraitində tərk ediblər - 1:1. İlk yarısı qolsuz bərabərliklə bitən bu oyunda hesabı 69-cu dəqiqədə slovenityalı müdafiəçi Jan Karniçnik açıb - 1:0. Lakin məğlubiyyətlə barışmaq istəməyən Serbiya milisi sonadək mübarizəni davam etdirib və sonda istəyinə çata bilib. Qarşılaşmanın əlavə edilən vaxtında (90+5) serb futbolçu Luka Yoviç bərabərlik qolunu vurmaqla komandasını məğlubiyyətdən xilas edib. 

Bununla da ilk turda Danimarka ilə sülh (1:1) bağlayan Sloveniya qrupda ikinci, startda İngiltərəyə minimal hesabla (0:1) uduzan Serbiya isə  birinci heç-heçəsini edib.

Yeri gəlmişkən, bu komandalar rəsmi oyunlarda 5-ci dəfə qarşılaşıb. Hərəyə bir dəfə qalib gələn rəqiblər qalan 3 oyunda heç-heçə edib. 

C qrupunda keçirilən digər oyunda isə Danimarka ilə İngiltərə üzləşir. Hazırda oyun davam edir. Hesabsa bərabərdir - 1:1. İngiltərədən Harri Kevin (18) Danimarkadan isə Yumann (34) fərqlənib. 

Gecə saatlarında isə B qrupunda İspaniya - İtaliya matçı olacaq. Bu cütün qalibi adını Avro-2024-ün pley-offuna yazdıracaq. İlk pley-offçu A qrupuna liderlik edən Almaniya millisidir. 

İNTİQAM Məmmədov