“Yaşa mənim xalqım”

Masallı rayonunda işğaldan azad olunmuş Ağdam və Kəlbəcər şəhər günləri münasibətilə tədbir keçirilib.

Ümumrayon tədbirində Masallı Rayon İcra Hakimiyyətinin başçısı Araz Əhmədov və digər rayon rəsmiləri, şəhid ailələri, qazilər, məcburi köçkün ailələri, ictimaiyyət nümayəndələri iştirak ediblər.

Əvvəlcə şəhər Heydər Əliyev parkında Ulu Öndərin abidəsi və Qəhrəmanlar parkında “Şəhidlər” abidə-kompleksi ziyarət edilib, önünə gül dəstələri düzülüb.

Sonra şəhər Heydər Əliyev Mərkəzində davam edən tədbir öncəsi Ümummilli lider Heydər Əliyevin və Azərbaycanın ərazi bütövlüyü, suverenliyi uğrunda canından keçən şəhidlərimizin xatirəsi bir dəqiqəlik sükutla yad edilib, dövlət himnimiz səsləndirilib.

Masallı Rayon İcra Hakimiyyətinin başçısı Araz Əhmədov, Azərbaycanın ilk Milli Qəhrəmanlarından olan Səfəralı Məmmədovun anası Şahdəstə Məmmədova, şəhid atası Qorxmaz Novruzov, rayon ağsaqqallar şurasının üzvü Fəxrəddin Talıbov, Vətən müharibəsi iştirakçısı, ehtiyatda olan zabit Həmid Mənsimov çıxışlarında bildiriblər ki, bu əlamətdar günlərin qeyd edilməsi Ulu Öndərin 100 illik yubileyinə həsr olunmuş silsilə tədbirlərin davamıdır.

Qeyd edilib ki, işğalçı Ermənistan Silahlı Qüvvələrinin Ağdamı, Kəlbəcəri və digər ərazilərimizi tərk etməsi Azərbaycan Prezidentinin siyasi liderliyi, sərkərdəlik qabiliyyəti və Azərbaycan Ordusunun 44 günlük Vətən müharibəsindəki uğurlu hərbi əməliyyatları nəticəsində mümkün oldu...

Tədbirdə Ağdam və Kəlbəcər rayonlarının işğaldan azad olunması və ərazilərdə aparılan abadlıq-quruculuq işlərindən bəhs edən videoçarx, məktəblilərin ifasında “Yaşa mənim xalqım” adlı ədəbi-bədii kompozisiya nümayiş olunub.

Akif AĞAYEV