41 təmsilçimizdən 13-cü Olimpiada-2024-lə 1 medalla vidalaşıb

İyulun 24-də Fransanın paytaxtı Parisdə startı verilən və Azərbaycanın 41 lisenziya ilə qatıldığı Olimpiada-2024-də artıq ilk 7 gün geridə qalıb. Bu ötən günlərdə iştirakçı ölkələrdən 43-ü aktivinə medal yazdırmağı bacarıb. Hazırda medal sıralanmasında ilk 3 yeri müvafiq ardıcıllıqla Yaponiya - 13 (7-2-4), Çin - 14 (6-6-2) və Avstraliya - 11 (6-4-1) tutur. Oyunlara ev sahibliyi edən Fransa 18 (5-9-4) medal qazansa da əyarına görə yalnız dördüncüdür. 7 gün ərzində hamıdan çox medal qazanan ABŞ - 26 (4-11-11) yalnız 6-cı sıradadır. 

Azərbaycana gəlincə, yığmamız cüdoçu Hidayət Heydərovun qazandığı yeganə qızıl medal sayəsində medal qazanan ölkələr sırasında 16-cı (16-21-ci yerlər hərəyə bir qızıl qazanıb) pillədə qərar tutub. Artıq Hidayət Heydərov da daxil omaqla 13 təmsilçimiz Olimpiada-2024-lə vidalaşıb. Qalan 12 olimpiyaçımız oyunlarla erkən və əliboş vidalaşıb. 

Olimpiadanın bu günə təsadüf edən 8-ci günü daha bir neçə təmsilçimiz yarış meydanına çıxacaq. Cüdo yarışlarında Elcan Hacıyev (90 kq), qadınların 3x3 basketbol turnirində Azərbaycan yığması ABŞ-a qarşı oyunda, triatlonçumuz Rostislav Pevtsov (1,5 km üzmək, 43 km veloyürüş, 10 km qaçış) isə özünü ikinci cəhddə sınayacaq.  

Bu gün badmintonçumuz Edi Reski Dviçao da mübarizə aparacaq. O, yer aldığı E qrupunda ikiqat Avropa çempionu olan Anders Antonsenlə (Danimarka) qarşılaşacaq (saat 18:30). 

İNTİQAM Məmmədov