Kişi basketbol millimiz AÇ-da üçüncü cəhddə də fiaskoya uğrayıb

Dünən Avstriyanın paytaxtı Vyanada Azərbaycan yığmaları da daxil olmaqla, 12 kişi və eyni sayda qadınlardan ibarət komandalar arasında 3x3 basketbolu üzrə startı verilən 9-cu Avropa çempionatı davam edir. Təəssüflər olsun ki, həm qadınların, həm də kişilərin yarışında mübarizə aparan Azərbaycan komandaları fiaskoya uğrayaraq mübarizəni erkən dayandırıb. 

Xatırladaq ki, heyəti Dina Ulyanova, Tatyana Deniskina, Aleksandra Mollenxauer və Mersedes Uolkerdən ibarət olan qadın yığmamız debut etdiyi Avropa çempionatı ilə dünən yer aldığı C qrupunda İspaniya (12:20) və Avstriya (7:21) millisinə uduzaraq dayandırmışdı. 

Heyəti Amil Həmzəyev, Cordan Devis, Cəbrayıl Əkbərov və Endar Poladxanlıdan ibarət olan və qitə çempionatına tarixində 3-cü dəfə qatılan kişi yığmamız da qadın komandamızla eyni aqibəti yaşayıb. Mübarizəyə başladığı C qrupuanda əvvəlcə Hollandiyaya (9:21), ardından isə ev sahibinə (18:20) uduzan kişi yığmamız da çempionatla vidalaşıb. Reqlamentə görə, qruplarda ilk 2 yeri tutan komandalar mübarizəni avqustun 24-də 1\4 finaldan davam etdirəcəklər.

Xatırladaq ki, əvvəlki iki qitə çempionatında (AÇ-2014 və AÇ-2022) cəmi 5 oyun keçirib. Onlardan İtaliya millisini məğlub edən kişi komandamız Hollandiya, Sloveniya. Rumıniya və Belçikaya məğlub olub. Yeri gəlmişkən, kişilərin geridə qalan 8 Avropa çempionatında Serbiya (5 dəfə), Rumıniya, Sloveniya və Latviya qalib gəlib. 

İNTİQAM Məmmədov