Azərbaycan müəllimlərinin XVI qurultayı keçirildi

2023-cü il 15-16 dekabr tarixlərində Bakı Konqres Mərkəzində Ümummilli lider Heydər Əliyevin 100 illik yubileyinə həsr olunmuş Azərbaycan müəllimlərinin XVI qurultayı keçirildi. 

Eyni zamanda, müəllimlərin bu ali məclisi Azərbaycanın ərazi bütövlüyünün tam bərpa olunması dövründə keçirilən ilk Müəllimlər Qurultayı kimi tarixə düşmüşdür. Bu şanlı tarixi dövr qarşıya yeni imkanlar və vəzifələr qoyur, eləcə də, Azərbaycanın sosial-iqtisadi qüdrətinin artması, təhsil sahəsində davamlı islahatların intensiv xarakter alması, rəqabətli insan kapitalının formalaşması, işğaldan azad edilmiş ərazilərimizdə təhsilin bərpası və inkişafı istiqamətində əhəmiyyətli addımların atılması ilə xarakterizə olunur.  

İki gün davam edən qurultayda dövlət və hökumət rəsmiləri, millət vəkilləri, media qurumlarının rəhbərləri, beynəlxalq, özəl, eləcə də qeyri-hökumət təşkilatlarının nümayəndələri, təhsil işçiləri, ekspertlər və digər qonaqlar iştirak etmişlər.

Qurultayda Üzeyir Hacıbəyli adına Bakı Musiqi Akademiyasını Əməkdar müəllim, Tədris işləri üzrə prorektor, professor Nərminə Quliyeva, Xalq artisti, Beynəlxalq əlaqələr və sosial məsələlər üzrə prorektor, professor Yeganə Axundova, Əməkdar incəsənət xadimi, fəlsəfə elmləri doktoru, Elm və yaradıcılıq işləri üzrə prorektor, professor Gülnaz Abdullazadə, Xalq artisti, Əməkdar müəllim, professor Hökumə Əliyeva, Əməkdar müəllim, professor Leyla Məmmədova təmsil etmişlər. 

Azərbaycan Respublikası Prezidentinin Sərəncamı ilə təsis  edilmiş ali təhsilin bakalavriat səviyyəsində əyani formada təhsil alan və təhsildə yüksək nailiyyətləri olan 100 tələbəyə “Heydər Əliyev adına təqaüd” təqdim olunmuşdur.

Sevindirici haldır ki, Azərbaycan tarixində ilk dəfə olaraq, Kənan Məmmədzadə (Xalq artisti, Əməkdar müəllim, professor Hökumə Əliyevanın sinifi-ll kurs tələbəsi) Üzeyir Hacıbəyli adına Bakı Musiqi Akademiyasının ilk  “Heydər Əliyev adına təqaüd”ün mükafatçısı adına layiq görüldü.

 Bu münasibətlə müəllim Hökumə Əliyeva və istedadlı tələbəsi Kənan Məmmədzadəni təbrik edir, yeni yaradıcılıq uğurları arzu edirik!