Lando Norris Hollandiya Qran-Prisinin qalibidir

O, cari mövsümdə və karyerasında ikinci Qran-Prisini udub

Formula-1 üzrə dünya çempionatında cari mövsümün sayca 15-ci olan növbəti Qran-Prisi Hollandiyadakı "Cricuit Park Zandvoort" avtodromunda keçirilib. 20 pilotun mübarizə apardığı yürüşün qalibi adını "Maklaren" komandasının britaniyalı pilotu Lando Norris qazanıb. Bu 25 yaşlı pilotun cari mövsümdə və eləcə də karyerasında Mayami Qran-Prisindən sonra ikinci qələbəsi olub. O, Hollandiyada uzunluğu 4258 metr olan trasda hamıdan tez 72 dövrə vurmaqla 306,587 km məsafəni qət edib. Maraqlıdır ki, yürüşə startdan birinci qatılan Norris ikinci dövrədə liderliyi əldən versə də 18-ci dövrədə Maks Ferstappeni örtərək yenidən liderliyi ələ keçirib. 

Yürüşdə ikinci yeri yarışların hazırkı lideri Maks Ferstappen ("Red Bull") tutub. Hollandiyalı pilot öz vətənində qalibdən 22,896 saniyə geri qalıb. İlk üçlüyü qalibdən 25,439 saniyə geri qalan monakolu Şarl Lekeler ("Ferrari") tamamlayıb.

Qeyd edək ki, yürüşdə 9-10-cu yerləri tutan fransalı pilot Pyer Qaşlı ("Alpine") və ispaniyalı Fernando Alonso ("Aston Martin") qalibdən 1 dövrə geridə qalıb. Müvafiq ardıcıllıqla 19-20-ci yeri tutan finlandiyalı Valtteri Bottas ("Alfa Romeo") və onun çinli komanda yoldaşı Qyanyuy Cjou isə əslindən 2 dövrə geri qalıb. Yeri gəlmişkən, yürüşdə mübarizə aparan 20 pilotun hamısı çıxışını finişə qədər davam etdirib.

Xatırladaq ki, mövsümün geridə qalan 15 mərhələ yarışından sonra pilotların yarış cədvəlinə Maks Ferstappen liderlik edir - 295 xal. İkinci yeri 225 xalla Lando Norris tutur. İlk üçlüyü aktivində 192 xalı olan Şarl Lekeler tamamlayır. Cədvəldə 4-10-cu yerləri isə Oskar Piastri (179), Karlos Sayns (172), Lyuis Hemlton (154), Serxio Peres (139), Corc Rassel (122), Fernando Alonso (50), Lens Strol (24) bölüşür.

Komandaların yarış cədvəlində isə vəziyyət belədir:

Red Bull - 434 xal, Maklaren - 404 xal, Ferrari - 370 xal, Mersedes - 276 xal, Aston Martin - 74 xal, RB - 34 xal, Haas - 27 xal, Alpine - 13 xal, Villiams - 4 xal, Alfa Romeo - 0 xal.

Qeyd: Növbəti Qran-Pri sentyabrın 1-də İtaliyada olacaq. Pilotlar 5787 metr trasda 53 dövrə vurmaqla 306,720 km məsafəni qət edəcəklər. Sentyabrın 15-də isə mövsümün Bakı Qran-Prisi keçiriləcək. 6001 metr uzunluğunda olan trasda pilotlar 51 dövrə vurmaqla 306,049 km məsafəni qət etməyə çalışacaqlar.

İNTİQAM Məmmədov