Ağcabədidə qarşıda duran vəzifələr, öhdəliklərlə bağlı toplantı keçirilib

Sentyabrın 16-da Ağcabədi Rayon İcra Hakimiyyətində qarşıdan gələn işlər, nəzərdə tutulmuş bir sıra öhdəliklərlə bağlı toplantı keçirilib. Tədbirdə Ağcabədi Rayon İcra Hakimiyyətinin başçısı Rafil Hüseynov, İcra hakimiyyəti başçısının müavini Xətai Zeynalov, bələdiyyələr, inzibati ərazi dairələri üzrə şəhər və kənd icra nümayəndələri, iş adamları və medai mənsubları iştirak ediblər. 
Ağcabədi Rayon İcra Hakimiyyətinin başçısı Rafil Hüseynov keçiriən nöbədənkənar Parlament seçkilərindən, seçkilərin uğurlu nəticəsindən, eyni zamanda qarşıdan gələn Bələdiyyə seçkilərinə başlanılacaq hazırlıq proseslərindən söz açıb. Rayon rəhbəri eyni zamanda özünü idarəetmə srtukturu olan bələdiyyələrin müvafiq iş prinsiplərindən, habelə bələdiyyə torpaqlarından düzgün istifadə qaydalarından danışıb.
Rayon rəhbəri qarşıdan gələn antiterror tədbirlərində şəhid olan hərbi qulluqçuların ildönümü, eləcə də 27 sentyabr – Anım Günü ilə bağlı rayon mərkəzində Qəhrəmanlar Parkı, Hindarx qəsəbəsində Şəhidlər Xiyabanı, Vətən Müharibəsi şəhidlərinin xatirəsinə ucaldılmış abidələrin, şəhid məzarlarının, habelə şəhid bulaqlarının təmizlənməsi, bərpası, ətrafının abadlaşdırılması, Vətən Müharibəsinə həsr olunmuş şüar-yazıların, bayraqların yenisi ilə əvəz olunması ilə bağlı aidiyyatı qurumlara, şəxslərə tapşırıqlar verib. 
Təsərrüfat sahəsində hazırkı və qarşıda duran məsələlər barədə danışan MKT Ağcabədi filialının direktoru İbrahim Ağamirov hazırda pambıqçılıq sahəsində mövcud olan çətinliklərdən və bu çətinliklərin aradan qaldırılması istiqamətində atılan addımlardan danışıb. İbrahim Ağamirov müəyyən çatışmazlıqların olmasına baxmayaraq Ağcabədi pambıqçısının yığıma tam hazır olduğunu əminliklə qeyd edib. 
Çıxış edən digər fermer, “Azərpambıq Azərbaycan Sənaye Koorparasiya” MMC-nin direktoru Kazım Gülmalıyev qeyd edib ki, may ayında havaların uzunmüddətli yağmurlu keçməsi və tempraturun nisbətən aşağı enməsi bəzi pambıq sahələrində normal bitişin alınmasına müəyyən çətinliklər yaradıb. Bunun müqabilində də sahələrdə əvvəlki illərə nisbətən xəstəliklər və ziyanvericilər daha çox olub. Buna baxmayaraq xəstəlik və ziyanvericilərə qarşı mütəmadi olaraq mübarizələr uğurla aparılıb. Bu il də havaların yağmurlu keçməsinə görə məhsulun yetişməsində müəyyən ləngimə müşahidə olunur. Hazırda filial olaraq pambıq yığımına ciddi hazırlaşırıq – deyə Kazım Gülmaylıyev vurğulayıb. 
Bundan sonra tədbirdə həmçinin taxıl səpininə hazırlıq prosesləri haqqında da geniş fikir mübadiləsi aparılıb. 

Mais İbrahimov