CÜDO

-------------

Bakı "Böyük Dəbilqə" yarışının vaxtı dəyişib

Turnir gələn il noyabrda deyil, fevralda keçiriləcək

Beynəlxalq Cüdo Federasiyasının (BCF) qərarına əsasən, 2024-cü ilin 1-3 noyabrında Bakıda keçirilməsi nəzərdə tutulan və Olimpiy lüsenziyasına xal verən "Böyük Dəbilqə" yarışının vaxtı dəyişdirilib. Belə ki, “Dünya Cüdo Turu” seriyasına daxil olan bu nüfuzlu turnir 16-18 fevral 2024-cü ildə keçiriləcək. Üç gün davam edəcək turnir Milli Gimnastika Arenasında baş tutacaq.

“Bu tarixlərdə daha öncə Tel-Əviv "Böyük Dəbilqə" yarışının keçirilməsi planlaşdırılırdı. Məlum hadisələrə görə təhlükəsizlik baxımından BCF bu turnirin keçirilməsini təxirə saldıqdan sonra biz gələn ilin noyabrında keçirilməsi nəzərdə tutulan Bakı "Böyük Dəbilqə" yarışının 16-18 fevral 2024-cü il tarixinə keçirilməsini təklif etdik. Təklifimizə müsbət cavab verdikləri üçün BCF-ə təşəkkürümüzü bildiririk”, - deyə Azərbaycan Cüdo Federasiyasının baş katibi Rəşad Rəsullu bildirib.

Baş katib hətta onu da qeyd edib ki, yarışın fevral ayına keçirilməsi burada toplanacaq xalların Paris 2024 Yay Olimpiya Oyunlarına lisenziya reytinq xallarının toplanmasına imkan verəcək. Vaxtın dəyişməsinin əhəmiyyətindən danışan Rəşad Rəsullu deyib: “Yarış noyabr ayında olsaydı Olimpiya Oyunlarından sonra baş tutacağına görə iştirakçı sayı əhəmiyyətli dərəcədə azalacaqdı. Həmçinin, bu yarış zamanı ev sahibi kimi hər çəkidə 4 idmançı sifariş edə biləcəyimizdən, bu da Olimpiya Oyunlarına lisenziya xallarının qazanılması baxımından müəyyən üstünlük yaradacaq”.

Sözügedən turnir Milli Gimnastika Arenasında təşkil ediləcək. Odur ki, Azərbaycan Cüdo Federasiyası bütün idman həvəskarlarını qeyd edilən tarixlərdə Milli Gimnastika Arenasına dəvət edir, dünyanın ən güclü cüdo ustalarının çıxışlarına tamaşa etməklə yanaşı, idmançılarımıza öz güclü azarkeş dəstəklərini verməyə çağırır.

Yeri gəlmişkən, Azərbaycan cüdoçuları 2023-cü il mövsümündə Bakının ev sahibliyi etdiyi analoji turnidə 5 (3-1-1) medal qazanıblar.

İNTİQAM Məmmədov