Rauf Məmmədov AÇ-da 5-ci yerdən 12-ci pilləyə, Məhəmməd Muradlı isə 11-dən 25-ə yuvarlanıb

Montoneqronun Petrovatse şəhərində kişi və qadın şahmatçılar arasında keçirilən və Azərbaycan təmsilçilərinin də iştirak etdiyi şəxsi Avropa çempionatı davam edir. Azərbaycanın 22 şahmatçı ilə təmsil olunduğu və İsveçrə sistemi üzrə keçirilməklə 11 turdan ibarət olan çempionatda 5-ci tura da yekun vurulub. Hesabat turunda 7 şahmatçımız qələbə qazanıb, 10 nəfər rəqiblə xal bölüb, 5 təmsilçimiz isə məğlubiyyətlə üzləşib. 

Riad Səmədov, Xəzər Babazadə, Vüqar Rəsulov, Şiroğlan Talıbov, Ayan Allahverdiyeva. Gövhər Beydullayeva və Ümid Aslanovun qalib gəldiyi turda Rauf Məmmədov, Məhəmməd Muradlı, Aydın Süleymanlı, Misrətdin İsgəndərov, Eltac Səfərli, Əhməd Əhmədzadə, Vasif Durarbəyli, Şahin Vəliyev, Eltac Abdulkərimov və Orxan Bağırov isə rəqiblə sülh bağlayaraq xal bölgüsünə razılaşıb. 

Qeyd edək ki, bu xal itkisi Rauf Məmmədovla Məhəmməd Muradlının turnir cədvəlindəki mövqeyinə mənfi təsir göstərib. Belə ki, aktivində 4 xalı olan Rauf Məmmədov cədvəldə 5-ci pillədən 12-ci yerə, Məhəmməd Muradlı isə 11-ci yerdən 25-ci yerə yuvarlanıb. 

Xatırladaq ki, mükafat fobndu 100 min avro təşkil edən çempionata noyabrın 19-da yekun vurulacaq. Qalib şahmatçı 20 min avro mükafat qazanacaq. Ümumiyyətlə, çempionatda Azərbaycan da daxil olmaqla 388 zəka sahibi mübarizə aparıır. 

İNTİQAM Məmmədov