Masallıda şəhid zabitin xatirəsi anılıb

Vüsal Məhərrəmov – 45

Masallı rayonunda Vətən müharibəsinin şəhid zabiti, 3-cü dərəcəli “Rəşadət” ordenli Vüsal Məhərrəmovun anadan olmasının 45-ci ildönümü münasibətilə tədbir keçirilib.  

Şəhidin vaxtilə oxuduğu təhsil ocağında – “Azərbaycan Bayrağı” ordenli şəhid Elşad Ağayev adına Hişkədərə kənd  tam orta məktəbində təşkil olunan anım mərasimi öncəsi Vətənimizin müstəqilliyi, torpaqlarımızın bütövlüyü uğrunda canını fəda edən şəhidlərimizin xatirəsi bir dəqiqəlik sükutla yad edilib.

44 günlük Vətən müharibəsində Müzəffər Ali Baş Komandan İlham Əliyevin rəhbərliyilə qazanılan tarixi zəfərin əhəmiyyətindən danışan məktəbin direktoru İlham Ağayev, müəllimlər Afət Əhmədova, Rafael Musayev və Vəfa Kərimova igid döyüşçü Vüsal Məhərrəmovun mənalı ömür yolundan, qəhrəmanlığından bəhs edib, onun göstərdiyi fədakarlığın gənc nəslə örnək olduğunu bildiriblər.

Şagirdlər Vətənə, şəhidlərə həsr olunan şeirlər səsləndiriblər.

Məlumat üçün bildirək ki, Vüsal Aslan oğlu Məhərrəmov 10 dekabr 1979-cu ildə Masallı rayonunun Hişkədərə kəndində, ziyalı ailəsində anadan olub.

1997-ci ildə kənd tam orta məktəbini əla qiymətlərlə bitirib. 1997-2001-ci illərdə Gəncə Kənd Təsərrüfatı Akademiyasında (indiki Azərbaycan Dövlət Aqrar Universitetində) təhsil alıb. Akademiyanı leytenant rütbəsi ilə bitirib. 

2003-cü ildə Naxçıvanda zabit kimi hərbi xidmət edib. Xidmət müddəti bitdikdən sonra nümunəvi zabit kimi əlavə olaraq bir il də xidmətdə saxlayıblar. 

Azərbaycan Ordusunun leytenantı Vüsal Məhərrəmov 2020-ci il sentyabrın 27-də Silahlı Qüvvələrimiz tərəfindən Ermənistanın işğalı altında olan ərazilərimizin azad edilməsi üçün başlanan Vətən müharibəsində Füzuli, Cəbrayıl, Qubadlı, Xocavənd, Hadrut, Şuşa istiqamətində gedən döyüşlərdə şücaət göstərib. Daşaltı bölgəsində gedən qızğın döyüşlərdə ayağından güllə yarası alsa da, o, 3 yaralı əsgəri döyüş meydanından çıxarıb. Şuşa istiqamətində gedən şiddətli döyüşlərdə qəhrəmancasına şəhid olub. Nəşi doğma kəndində torpağa tapşırılıb.

Ailəli idi. İki oğul övladı – Nicat və Nihad Vətənə yadigar qalıb. 

Prezident İlham Əliyevin müvafiq sərəncamlarına əsasən şəhid baş leytenant Vüsal Aslan oğlu Məhərrəmov ölümündən sonra “Vətən uğrunda”, “Cəsur döyüşçü”, “Şuşanın azad edilməsinə görə”, “Füzulinin azad edilməsinə görə” medalları, 3-cü dərəcəli “Rəşadət” ordeni ilə təltif edilib.

Adına məktəb, küçə verilib. “Palmali” Şirkətlər qrupu tərəfindən Vüsal Məhərrəmovun adını daşıyan gəmi Türkiyə sularında üzür. 

Akif AĞAYEV