Şərif Ağayar: 

Bir az da gəl mənim intonasiyamı dinlə, gör canımda nə sızıltılar var..

Dekabrın 15-i Ramiz Rövşənin ad günü idi. İlk dəfə onunla həmsöhbət olanda dəli oldum. O, dünyanın ən böyük sirrini bilirdi: intonasiya! Və bildiyi üçün haqlı ustadlıq edirdi. Deyirdi, Müşfiqə bax, sağa-sola çox intonasiya oynadıb. Düz deyirdi. Dediyi usta işini növbəti dəfə öz şeirində tapdım:

Ana, məndən keçən bu işıq nəymiş

Ana, mən ki işıqyeyən deyiləm.

Görünür bəxtim beləymiş,

Bəxtimi söyən deyiləm...

Ölməmişəm, ağlamaayın,

Keçin ayaq saxlamayın...

Onbirlikdən səkkizliyə - qoşmadan gəraylıya elə keçir, elə bil dul xalan pullu bir naxçıvanlıya ərə gedir.

Halbuki dörd dörd üç - altı beş yerini dəyişəndə adamın içində termos qırılır.

İnanılmaz masterlik!

Bu gün Azərbaycanın sağ ən böyük şairinin ad günüdür.

Təbrik edirəm, ürəkdən, Ramizi çox sevmişəm, əzbər bilirəm...

Lakin...

O zülmün yanındadır...

Yetmiş dəfə demişik, görüşək, söhbət edək, danışaq. Anlayıram e, qorxular var. Oğraş sistemdi. Danışmamağı anlayıram. Lakin Ramiz müəllim Ruhin xanıma müsahibə verəndə dəli oluram. Dinmə də. Baş tacımız, varlığımızın səbəbi möhtərəm P majestelərinin dostu - məlum dahi şəxsiyyətin xsnımı Ruhin xanım nəfslə bağlı sual verəndə Ramiz müəllimin sovet avtobusları kimi yellənıə-yellənə xodlanaraq gülmıyinə dözə bilmirəm. Əslində hırıldamaq, hırtıldamaq, qarnını yellədərək gülmək demirəm, utanıram, amma Ramiz müəllimin içinin səsini də eşitməyə bilmirəm:

- Ruhin xanım, məni bura gətirən elə nəfs deyilmi?

Və Məmməd İsmayılı tərifləyir... Tovuz... Bildiz də... İcazə... O Məmməd İsmayıl ki, AYB-nin qurultayında demişdi, Anar müəllim, mən sizi cavan qoyub getmişdim, bir cavan namizəd yoxdu?

Və Ramiz orda Anarı heç bir əxlaqa sığmayan, yanında dayanmağı ilə fəxr etdiyi Tarkovskinin ruhunu təhqir edərək gözümüzə, könlümüzə və ruhumuza soxuşdurdu.

Ad günündə çox narahatlıq yaratmayaq. Ramiz müəllimi - böyük ustadı təbrik edirəm, deyirəm, müəllim, bir az da gəl mənim intonasiyamı dinlə, gör canımda nə sızıltılar var və... gedirəm ağlamağa...